Azərbaycan, Bakı, 31 avqust / Trend , müxbir A.Hüseynbala /
Azərbaycanın müxalifət partiyası bölgələrdən bələdiyyə üzvlüyünə 432 nəfərin namizədliyini irəli sürəcək.
"Bakının ayrı-ayrı rayonlarındakı bələdiyyələrə namizədlərin müəyyənləşdirilməsi prosesi isə sentyabrın 15-dək başa çatdırılacaq", - bazar ertəsi Trend -a Azərbaycan Liberal-Demokrat Partiyasının (ALDP) sədri Fuad Əliyev bildirib.
Trend -un arayışı: Azərbaycanda bələdiyyə seçkisinin 2009-cu il dekabrın ortalarında keçiriləcəyi gözlənilir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
May ayında Azərbaycan Parlamentində "Bələdiyyələrin birləşdirilməsi haqqında" qanun qəbul edilib.
Əliyevin sözlərinə görə, bundan əvvəl keçirilən seçkilərdə partiyanın 600-a yaxın üzvü bələdiyyəyə seçilib. "Düşünürəm ki, builki seçkilərdə yeni seçilən üzvlərimizin sayı bundan az olmayacaq", - ALDP sədri əlavə edib.
АLDP 1999-cı ildə yaradılıb. 2000-ci ildə partiyanın sədri Zakir Məmmədov vəfat etdikdən sonra 2001-ci ildə ALDP ikiyə bölünüb. Valeh İbadov və Fuad Əliyev hər ikisi ALDP adına iddia ediblər. 2004-cü ildə Ali Məhkəmənin qərarı ilə Fuad Əliyevin rəhbərlik etdiyi partiya ALDP kimi tanınıb və dövlət qeydiyyatından keçib.
Məqalə müəllifi ilə əlaqə ünvanı: [email protected]
