Azərbaycan, Bakı, 07 sentyabr / Trend , müxbir C.Babayeva /
Azərbaycanın Mərkəzi Seçki Komissiyası (MSK) bazar ertəsi dairə seçki komissiyalarının sədrləri üçün seçki hüququ üzrə ixtisaslaşdırılmış kurslara start verib.
Kursların keçirilməsində məqsəd Prezidentin "Azərbaycan Respublikasında İnsan hüquqlarının müdafiəsi üzrə Milli Fəaliyyət Planının təsdiq edilməsi haqqında" Sərəncamına əsasən, MSK qarşısında qaldırılmış vəzifələrin icrası ilə bağlı seçki sahəsində maarifləndirmə işinin gücləndirilməsi, dairə seçki komissiyaları sədrlərinin peşəkar hazırlığının artırılmasıdır.
Kursların açılış mərasimində MSK sədri Məzahir Pənahov, Azərbaycan Prezidenti Administrasiyasının şöbə müdirləri Zeynal Nağdəliyev və Şahin Əliyev, Azərbaycan Respublikası Prezidenti yaynında Dövlət İdarəçilik Akademiyasının rektoru Seyfəddin Qəndilov və digər rəsmi şəxslər iştirak edib.
Sentyabrın 12-dək keçiriləcək kurslarda Konstitusiya Məhkəməsinin sədri Fərhad Abdullayev, Ali Məhkəmənin sədri Ramiz Rzayev, Prezident Administrasiyasının şöbə müdiri Əli Həsənov, Milli Məclisin daimi komitə sədri Arif Rəhimzadə, daxili işlər nazirinin müavini Oruc Zalov, Ədliyyə Nazirliyi və Respublika Baş Prokurorluğunun məsul şəxsləri, MSK-nın üzvləri və şöbə müdirləri, Şəhər Bələdiyyələri Milli Assosiasiyasının sədri mühazirələr oxuyacaq. Kursların sonunda DSK sədrlərinə sertifikatlar təqdim ediləcək.
Sentyabrın 23-dən 25-dək isə dairə seçki komissiyalarının üzvləri və məntəqə seçki komissiyalarının sədrləri üçün seçki hüququ üzrə ixtisaslaşdırılmış kurslar keçiriləcək.
Məqalə müəllifi ilə əlaqə ünvanı: [email protected]
