Azərbaycan, Bakı, 16 oktyabr / Trend , müxbir A..Hüseynbala/
Azərbaycanın müxalifət partiyasının üzvü hərəkatın bələdiyyə seçkilərində birgə iştirakı üçün irəli sürdüyü təklifin həm müxalifətin, həm də cəmiyyətin xeyrinə olduğunu düşünür.
"Seçki komissiyalarının tərkibində dəyişiklik edilməyincə, bizim seçkilərdə səslərimizi reaqllaşdırmaq ikanımız olmayacaq", - cümə günü Trend -a "Qarabağ və Respublika Uğrunda Hərəkat"da təmsil olunan Müsavat Partiyasının Divan üzvü Vurğun Əyyub bildirib.
Trend -un arayışı: "Qarabağ və Respublika Uğrunda Hərəkat"da təmsil olunan Müsavat Partiyası Ümid Partiyasının seçki komissiyalarındakı üzvlərinin geri çağırılmasını tələb edir. Ümid Partiyası isə Müsavat depuatat qrupu üzvlərinin mandatlarından imtina edəcəyi təqdirdə tələbin yerinə yetirələcəyini bəyan edib. Hər iki partiya arasında yaranan bu gərginlik hərəkat daxilində ciddi böhrana səbəb olub.
Əyyubun sözlərinə görə, Milli Məclisdə deputatların sayına görə ikinci olan Müsavatın seçki komissiyalarında daha çox sayda təmsil olunmaq imkanları olub.
"Amma partiyamız bu yerlərdən komissiyaların bu şəkildə formalaşdırılmasının tərəfdarı olmadığı üçün imtina edib. Biz seçki komissiyalarında təmsil olunmaqdan imtina etmişiksə, hansı məntiqlə müxalifət kimi birgə seçkilərdə iştirak edəcəyimiz partiyanın komissiyalarda təmsil olunması ilə razılaşmalıyıq", - Müsavat funksioneri əlavə edib.
Onun fikrincə, bu təklifin mahiyyəti əslində seçki komissiyalarının ədalətli şəkildə təşkilinə təkan verməkdir. "Əgər Ümid Partiyası təklifimizə razılaşarsa, komissiyaların yenidən formalaşdırılmasına nail ola bilərik. Bizim buna nail olmaq üçün başqa şansımız yoxdur", - Əyyub vurğulayıb.
Divan üzvü Müsavatın bu təklifi ilə müxalifətin birliyini növbəti dəfə dağıtmaq iddiaları ilə razılaşmır.
"Bu fikri irəli sürmək sadəcə olaraq cəmiyyətin diqqətini öz əməllərindən yayındırmaq cəhdidir. Təklifimizlə razılaşmayan Ümid Partiyasının da hər hansı hərəkatı parçalamaq imkanları yoxdur. Digər tərəfdən, parçalanmanı istəmirlərsə, bütün cəmiyyətin və müxalifətin marağında olan təklifi qəbul etsinlər", - Əyyub qeyd edib.
"Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları 2009-cu il martın 18-də Konstitusiyaya təklif olunan əlavə və dəyişikliklərlə bağlı keçirilən referendum ərəfəsi təsis ediblər.
Məqalə müəllifi ilə əlaqə ünvanı: [email protected]