Azərbaycan, Bakı, 14 aprel /Trend, müxbir T.Hacıyev/
Azərbaycanın müxalifət partiyası aprelin 14-də Bakı Şəhər İcra Hakimiyyətinin binası qarşısında piket keçirməyə cəhd edib.
Trend-in məlumatına görə, Müsavat Partiyasının 50-yə yaxın üzvü saat 12:00 radələrində Dövlət Filarmoniyası tərəfdən İcra Hakimiyyətinin binası qarşısına gələrək, mitinq keçirməyə cəhd göstərib.
Səbail Rayon Polis İdarəsinin əməkdaşları mitinq iştirakçılarının qarşısını alaraq, aksiyanın baş tutmasına imkan verməyiblər.
Aksiya iştirakçıları arasında saxlanılanlar var.
Piket iştirakçıları söz, sərbəst toplaşmaq azadlığı ilə bağlı şüarlar səsləndiriblər.
Bakı Şəhər Baş Polis İdarəsinin rəis müavini Yaşar Əliyev jurnalistlərə bildirib ki, 7-8 nəfər aksiya iştirakçısı Səbail RPİ-nin 8-ci polis bölməsinə aparılıb.
Rəis müavini Müsavat deputat qrupunun üzvləri Arzu Səmədbəyli və İkram İsrafillə danışıq aparıb və onlara bildirib ki, Bakı Şəhər İcra Hakimiyyəti aksiya keçirmək üçün hər bir rayonda yer ayırıb və aksiyalar da həmin yerlərdə keçirilməlidir.
Ötən həftəyə nəzərdə tutulan piket Bakı Şəhər İcra Hakimiyyəti icazə vermədiyi səbəbindən təxirə salınmışdı.
Müsavat Partiyası 1911-ci ilin oktyabrında Bakıda yaradılıb. Müsavat Partiyasının (bərpa) qurultayı 1992-ci il noyabrın 7-də Bakıda "Respublika" sarayında keçirilib. Gizli səsvermənin yekunları əsasında İsa Qəmbər əksəriyyət səslə Müsavat Partiyasının başqanı seçilib.
Qəmbər Аzərbаycan Pаrlаmеntinin еks-spikеri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Pаrtiyа 4 nəfər deputatla Parlamentdə təmsil olunur.
