Azərbaycan, Bakı, 3 may /Trend, müxbir Ü.Sadıxova/
Yerevanda türk bayrağının yandırılmasına etiraz əlaməti olaraq Türkiyə-Ermənistan sərhədində aksiya keçiriləcək. Bu barədə Trend-ə İğdır şəhər bələdiyyəsindən məlumat verilib.
Aprelin 24-də Ermənistan paytaxtında nümayişçilər Ankaranın "erməni soyqırımı"nı tanımaqdan imtina etməsinə etiraz əlaməti olaraq Türkiyə bayrağını yandırıblar.
Türk bayrağının məhv edilməsi Türkiyədə qəzəblə qarşılanıb.
Etiraz aksiyası mayın 8-də günün ikinci yarısında başlayacaq və "Öz bayrağını müdafiə et!" şüarı altında keçiriləcək. Aksiyada şəhid ailələri və veteran təşkilatları, eləcə də digər qeyri-hökumət təşkilatlarının nümayəndələri iştirak edəcəklər.
Ermənistan və erməni lobbisi iddia edir ki, Türkiyənin sələfi - Osmanlı İmperiyası 1915-ci ildə Anadoluda yaşayan ermənilərə qarşı "soyqırım" həyata keçirib. Bu faktın bütün dünyada tanınmasını istəyən ermənilər dünya ölkələrində "soyqırım" təbliğatını gücləndirərək, onun bəzi dövlətlərin parlamentləri tərəfindən tanınmasına nail olublar.