Azərbaycan, Bakı, 16 avqust /Trend, müxbir T.Hacıyev/
Azərbaycanın müxalif "Müsavat" və Xalq Cəbhəsi partiyalarının vahid namizədlərinin müəyyənləşməsi üçün ilkin seçki praktikasından istifadə oluna bilər. Bu barədə bazar ertəsi Trend-ə "Müsavat" partiyasının mərkəzi icra aparatının rəhbəri Arif Hacılı bildirib.
"Bakı və Sumqayıt şəhərlərində bəzi dairələr üzrə vahid namizədin müəyyənləşməsi istiqamətində hələ də razılıq əldə olunmayıb. Vahid namizədlərin müəyyənləşməsi üçün müxtəlif metodlardan istifadə olunacaq. Ola bilər ki, hər iki partiyanın birgə iştirakı ilə ilkin seçki praktikasından istifadə olunsun", - Hacılı əlavə edib.
İyulun 15-də AXCP-nin yaranmasının 21 illiyinə həsr olunmuş tədbirdə "Müsavat" başqanı İsa Qəmbər AXCP ilə "Müsavat"ın birləşərək bir partiya olmasını təklif edib. Hazırda hər iki partiyanın Parlament seçkilərində blok şəklində iştirakı üçün danışıqlar davam etdirilir. Avqustun 14-də hər iki partiyanın sədrləri razılıq əldə etmək üçün görüş keçiriblər.
Partiya funksioneri "Müsavat" və AXCP sədrlərinin ötən həftənin şənbə günü keçirilən görüşünün nəticələrindən də danışıb.
"Müsavat" ilə AXCP sədrlərinin avqustun 14-də keçirilən görüşü zamanı 63 dairə üzrə vahid namizədlər müəyyənləşib. Namizədlərin 61-i "Müsavat" ilə AXCP-nin, 2 namizəd isə partiyalar tərəfindən müdaifə olunacaq bitərəf namizədlərdir".
Azərbaycanda Parlament seçkilərinin 2010-cu ilin noyabr ayının 7-də keçiriləcəyi gözlənilir. Bundanəvvəlki seçkilər 2005-ci ilin noyabr ayında keçirilib. Azərbaycanda Parlament seçkiləri majoritar sistem üzrə 125 seçki dairəsində keçirilir.