Azərbaycan, Bakı, 26 avqust /Trend, müxbir T.Hacıyev/
Azərbaycanın müxalif Müsavat və Xalq Cəbhəsi (AXCP) partiyaları seçki bloku yaratmaq üçün 15 dairədə razılığa gələ bilmirlər. Bu barədə cümə axşamı Trend-ə Müsavat Partiyası Mərkəzi İcra Aparatının rəhbəri Arif Hacılı bildirib.
"Dünən AXCP və Müsavat partiyaları rəhbərlərinin görüşü keçirilib. Hər iki partiya üçün vazkeçilməz dairələr müəyyənləşib. Partiyalar, təxminən, 15 dairə üzrə razılığa gələ bilmirlər", - Hacılı əlavə edib.
İyulun 15-də AXCP-nin yaranmasının 21 illiyinə həsr olunmuş tədbirdə Müsavat başqanı İsa Qəmbər AXCP ilə Müsavatın birləşərək bir partiya olmasını təklif edib. Hazırda hər iki partiyanın birgə seçki bloku yaratması ətrafında danışıqlar gedir.
Hacılı qeyd olunan problemin aradan qaldırılması üçün təkliflərin də səsləndiyini bildirib.
"Təklif irəli sürülüb ki, razılıq əldə olunması mümkün dairələr üzrə yerli partiya strukturlarında müzakirələr aparılsın və namizədlər özləri təkliflər irəli sürsünlər", - Hacılı bildirib.
Azərbaycanda Parlament seçkilərinin 2010-cu ilin noyabr ayının 7-də keçiriləcəyi gözlənilir. Bundanəvvəlki seçkilər 2005-ci ilin noyabr ayında keçirilib. Azərbaycanda Parlament seçkiləri majoritar sistem üzrə 125 seçki dairəsində aparılır.
Onun sözlərinə görə, görüşdə kütləvi aksiyalar keçirilməsi məsələsi də müzakirə olunub.
"Kütləvi aksiyaların sentyabr aynın əvvəllərindən başlayaraq bərpa olunması qərara alınıb", - partiya funksioneri deyib.
