Azərbaycan, Bakı, 1 oktyabr /Trend, müxbir T.Hacıyev/
Azərbaycanın müxalif Klassik Xalq Cəbhəsi Partiyası (KXCP) seçkilərdən sonra qurultay keçirməyi planlaşdırır. Bu barədə cümə günü Trend-ə KXCP sədri Mirmahmud Mirəlioğlu məlumat verib.
Onun sözlərinə görə, partiyanın rayon və şəhər təşkilatlarının bir çoxunda artıq qurultayla bağlı konfranslar keçirilib. "Parlament seçkiləri başa çatdıqdan sonra bu məsələyə bir daha aydınlıq gələcək. Neçə rayon şöbəsində konfransın keçiriləcəyi müəyyənləşəcək. Qismət olsa, ilin sonuna kimi qurultay keçirəcəyik", - Mirəlioğlu əlavə edib.
Azərbaycanda parlament seçkiləri noyabrın 7-də keçiriləcək. Sentyabrın 3-də seçkilərə rəsmi start verilib. Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində aparılır.
Partiya sədri qeyd edib ki, nizamnaməyə uyğun olaraq qurultayda sədrin hesabatı, Ali məclisin sədrinin hesabatı, Mərkəzi nəzarət-təftiş komissiyasının hesabatı dinləniləcək.
"Partiyada dəyişikliklər edilməsi ilə bağlı bəzi təkliflər var. Lakin partiyanın siyasi kursunun və siyasi sistemdə mövqeyinin dəyişdirilməsi ilə bağlı prinsipial dəyişikliklər edilməsi barədə təkliflər yoxdur", - Mirəlioğlu bildirib.
Klassik Xalq Cəbhəsi Partiyası 2006-cı ildə təsis edilib, 2007-ci ildə qeydiyyatdan keçib. İdeologiyasının əsasında bütöv Azərbaycan, milli demokratiya, müsavatçılıq ideyaları dayanır. Partiya siyasi sistemdə sağ mövqedədir. Partiyanın hazırkı sədri Mirmahmud Mirəlioğludur.