Azərbaycan, Bakı, 4 noyabr /Trend, müxbir E.Tarıverdiyeva/
Respublikaçılar Konqresin Alt palatası üzərində nəzarəti əldə etdikdən sonra ABŞ-ın siyasəti demokratların dövründə olduğundan daha az erməniyönümlü ola bilər. Cənubi Qafqaz üzrə amerikalı ekspert Mark Kats belə fikirləşir.
"Konqres vaxtı ilə ABŞ-ın erməni lobbisinin vacib seçici bloku olduğu Kaliforniyadan seçilən Nümayəndələr Palatasının spikeri Nensi Pelosinin rəhbərliyi altında daha çox erməniyönümlü mövqe tuturdu", - elektron poçtla Yaxın Şərq siyasəti üzrə Şuranın (Vaşinqton) elmi əməkdaşı Kats deyib.
Çərşənbə axşamı ABŞ-da Konqresə aralıq seçkilər keçirilib. Seçkilərdə vətəndaşlar Nümayəndələr Palatasının tam tərkibini, senatın üçdə birini və 37 ştatın qubernatorunu seçiblər. Respublikaçılar partiyası Nümayəndələr Palatası üzərində nəzarət qazanıb. İndi onun palatadakı yeri demokratlara nisbətdə 60 yer çoxdur. Demokratik partiya - Obamanın partiyası Senat üzərində nəzarəti saxlayıb.
Kaliforniya ştatından olan amerikalı siyasətçi-demokrat, ABŞ Konqresinin Nümayəndələr Palatasının deputatı Pelosi Konresdə Ermənistana dəstək qrupunun həmsədridir.
2007-ci il yanvarın 4-də Pelosi ABŞ Nümayəndələr Palatasının sədri (spikeri) seçilməklə, ABŞ tarixində bu vəzifədə ilk qadın olub. 2010-cu il seçkilərində Pelosini spiker postunda 60 yaşlı Con Beyner əvəz edib.
Ekspertin fikrincə, lakin Konqresin daha az erməniyönümlü olacağı onu və ya ABŞ-ın xarici siyasətini ümumilikdə Azərbaycanyönümlü etməyəcək.
"İndi Konqresin "bölünməsini", Prezident Obamanın 2010-cu il seçkiləri nəticəsində siyasi baxımdan zəiflədiyini nəzərə alsaq, mən ABŞ-ın indiki rəhbərliyinin Cənubi Qafqazla bağlı hansısa yeni təşəbbüslər irəli sürəcəyinə çox şübhə edirəm", - Kats qeyd edib.
Ağ Evdə demokrat Barak Obamanın hakimiyyətə gəlişi ilə ABŞ xarici siyasətə deyil, daha çox daxili problemlərə diqqət yetirməyə başlayıb. Vaşinqton üçün regiondan enerji marşrutlarının keçməsinə görə böyük maraq kəsb edən Cənubi Qafqaz ABŞ administarsiyasının nəzarətindən kənar qalıb.
Bakıda il yarıma yaxındır ki, Birləşmiş Ştatlar səfirinin yeri vakantdır. Diplomatik nümayəndəliyin əvvəlki rəhbəri Enn Dörsinin səlahiyyət müddəti keçən ilin iyulunda başa çatıb və o vaxtdan yeni səfirin təyin edilməsi yubadılır.