Azərbaycanın Meksikadakı səfiri Çilidə səfərdə olub

Azərbaycan, Bakı, 3 dekabr /Trend/

Azərbaycanın Meksikadakı səfiri İlqar Muxtarov Çili Respublikasında işgüzar səfərdə olub.

Azərbaycanın Meksikadakı səfirliyindən Trend-ə verilən məlumata görə, səfər çərçivəsində Muxtarov Çili Xarici İşlər Nazirliyinin Avropa üzrə idarəsinin rəisi Daniel Karvayo Kepernik (Daniel Carvallo Cepernic) ilə görüşüb.

Görüş zamanı, Muxtarov Azərbaycanın xarici işlər naziri Elmar Məmmədyarovun Çili xarici işlər naziri Alfredo Moreno Çarmeyə ünvanladığı məktubu təqdim edib.

Tərəflər bir sıra sahələrdə ikitərəfli münasibətlərin genişləndirilməsi perspektivlərini nəzərdən keçirib, o cümlədən mədəniyyət, təhsil, iqtisadi-ticari əməkdaşlığın inkişaf etdirilməsinə dair fikir mübadiləsi aparıblar.

Karvayo qeyd edib ki, uzun illər ərzində siyasi stabilliyin mövcud olması nəticəsində Çili regionun ən aparıcı ticarət ölkələrindən biri olub və bu xüsusda, Çili Azərbaycanla münasibətlərin daha yüksək müstəviyə keçirilməsi və ticarət əlaqələrinin, həmçinin enerji sektorunda əməkdaşlığın inkişafında maraqlıdır.

Muxtarov Məmmədyarovun 2005-ci ildə Çiliyə, həmçinin Çilinin xarici siyasət rəhbərinin Bakıya səfərini xatırladaraq, bu səfərlərin iki ölkənin XİN-ləri arasında əməkdaşlığın inkişaf etdirilməsi, hüquqi bazanın genişləndirilməsinə töhfə verəcəyinə inamını ifadə edib.

Görüş zamanı, Muxtarov Çili Xarici İşlər Nazirliyinin rəsmilərinə Azərbaycanın tarixi, həmçinin Ermənistanın ölkəmizə qarşı həyata keçirdiyi işğalçı və etnik təmizləmə siyasəti, münaqişənin həlli istiqamətində aparılan danışıqlar prosesi haqqında müvafiq xəritə əsasında məlumat verib.

Çiliyə işgüzar səfər çərçivəsində Muxtarov Çili Diplomatik Akademiyasının Direktoru Pablo Kabrera Qaete (Pablo Cabrera Gaete) ilə görüşüb.

Azərbaycana səfər etmək arzusunda olduğunu bildirən Kabrera təhsil sahəsində ikitərəfli hüquqi bazanın genişləndirilməsinin vacibliyini söyləyib.

Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az

Trend-in ən mühüm və maraqlı xəbərlərini "Telegram"da izləyin