Azərbaycan, Bakı, 28 yanvar /Trend, müxbir S.Ağayeva/
Bakı şəhərində yanvarın 30-u - fevralın 6-da NATO Azərbaycan Beynəlxalq Məktəbinin (NISA) növbəti qış sessiyası keçiriləcək. Qış sessiyası NATO-nun yeni strateji konsepsiyasına həsr olunacaq. Bu barədə Trend-ə cümə günü XİN-in mətbuat xidmətindən məlumat verilib.
Məlumata görə, sessiya ərzində NATO-nun strateji konsepsiyalarına tarixi yanaşma və onların qiymətləndirilməsi, cari təhlükəsizlik təhdidləri, NATO-nun yeni strateji konsepsiyası, NATO və tərəfdaşlıq münasibətləri və yeni strateji konsepsiyanın praktiki olaraq həyata keçirilmə imkanları müzakirə olunacaq.
Yanvarın 31-də qış sessiyasının açılış mərasimi keçiriləcək.
Açılış mərasimində Azərbaycan Respublikası xarici işlər nazirinin müavini Araz Əzimov, NATO-nun Azərbaycan üzrə təmas nöqtəsi səfirliyi kimi fəaliyyət göstərən Rumıniyanın Bakıdakı diplomatik nümayəndəliyinin rəhbəri Nikolay Urexe və NATO-nun Beynəlxalq Hərbi Qərargahının Əməkdaşlıq və Regional Təhlükəsizlik İdarəsinin rəhbəri, general-mayor Branko Karlosun çıxışları nəzərdə tutulur.