Azərbaycan, Bakı, 26 aprel /Trend, müxbirlər E.Tariverdiyeva, T.Cəfərov/
İran və "altılıq" arasında növbəti danışıqların ilkin şərtləri yoxdur. Bu barədə cümə axşamı Trend-ə Avropa İttifaqının xarici siyasət üzrə komissarı Ketrin Eştonun nümayəndəsi Maykl Mann bildirib.
Bağdad İran və "altılıq" arasında danışıqların növbəti raundunu mayın 23-də keçirməyə hazırlaşır. Tərəflərin bundan əvvəlki görüşü aprelin 14-də İstanbulda baş tutub.
"Yaxın bir neçə həftə ərzində Aİ-dən olan danışıq iştirakçıları iranlılarla işləyəcək. Burada məqsəd qarşıdakı görüşün gündəliyini hazırlamaqdır. Bu, açıq iclasdır", - Mann deyib.
Bağdadda iclasın təhlükəsizliyinin təmin edilməsi haqqında danışan Maykl Mann bəyan edib ki, Avropa tərəfinin heç bir narahatlığı yoxdur.
"Bütün təhlükəsizlik məsələləri əvvəlcədən müzakirə edilir. Ötən həftə Bağdadda bu məsələlər üzərində mütəxəssislərimiz artıq işləyiblər", - o qeyd edib.