Azərbaycan, Bakı, 30 aprel /Trend, müxbirlər E.Tarıverdiyeva, D.Xatınoğlu/
ABŞ-ın kimyəvi silahı beynəlxalq təhlükəsizliyi təhdid edir. Bu barədə bazar ertəsi Trend-ə İran Xarici İşlər Nazirliyinin nümayəndəsi Ramin Mehmanpərəst bildirib.
RİA Novosti-nin məlumatına görə, Rusiya aprelin 29-da 25 min tona yaxın kimyəvi silah məhv edib.
1997-ci ilin bu günü Kimyəvi silahlar haqqında Beynəlxalq Konvensiya qüvvəyə minib. Bu günədək BMT-nin 195 üzvündən 188-i sazişi imzalayıb və 2012-ci il aprelin 29-dək öz kimyəvi silah ehtiyatlarını tam məhv etməklə bağlı öhdəlik götürüb.
Lakin müvafiq olaraq, 40 000 və 27 000 ton kimyəvi silah ehtiyatına malik Rusiya və Birləşmiş Ştatlar qrafikdən geri qaldıqlarını və kimyəvi silahların tam məhvinin 2015-ci il dekabrın 31-dək təxirə salındığını bəyan ediblər.
Mehmanpərəstin məlumatına görə, İran İran-İraq müharibəsi (1980-1988-ci illər) zamanı kimyəvi silah qurbanı kimi, mövcud kimyəvi silah ehtiyatlarına qarşı ciddi şəkildə mübarizə aparmağı qərar alıb və dünyanın nüvə, kimyəvi və bioloji silahlar daxil olmaqla, kütləvi qırğın silahları olmadan yaşayacağına ümid edir.
"Dünyada kimyəvi silahların əsas sahibləri öz öhdəliklərini yerinə yetirmirlər ki, bu da beynəlxalq təhlükəsizliyi təhdid edir", - o deyib.
