Gürcüstan, Tbilisi, 8 noyabr /Trend, müxbir N.Kirsxaliya/
Gürcüstan Silahlı Qüvvələrinin Birləşmiş Ştabının rəisi Georgi Kalandadzeyə qarşı rəsmi ittiham irəli sürülüb. Trend-in məlumatına görə, bu barədə cümə axşamı Tbilisi polisinin binası önündə toplaşan jurnalistlərə vəkil Qoqita Qabaidze deyib.
Onun sözlərinə görə, general Gürcüstan Cinayət Məcəlləsinin 333-cü maddəsi üzrə (vəzifə səlahiyyətlərini aşma) ittiham edilir.
Qabaidze bildirib ki, irəli sürülən ittihamlar üzrə hüquqlarını müdafiə etdiyi Kalandadzenin rəsmi mövqeyi 2-3 gündən sonra səsləndiriləcək. Bu, ittiham edən tərəfin sübutları ilə tanışlıqdan sonra olacaq.
Kalandadze sabiq müdafiə naziri Baço Axalaya və Müdafiə Nazirliyinin 4-cü briqada rəisi Zurab Şamatava ilə birlikdə 6 əsgərin döyülməsində ittiham olunur.