Azərbaycan, Bakı, 18 aprel /Trend, müxbir T.Cəfərov/
İran heç şübhəsiz ki, pilotsuz təyyarələrin istehsalı sahəsində nailiyyətlər əldə edib, lakin bu nailiyyətlərin nə dərəcədə həyata keçirildiyi bilinmir. Bunu Trend-ə çərşənbə axşamı İran Silahlı Qüvvələrinin sabiq komandiri, hərbi məsələlər üzrə ekspert Hüseyn Aryan deyib.
"İran idda edir ki, istehsal etdiyi pilotsuz təyyarələr radardan yayınma və raket daşıma qabiliyyətinə malikdir, lakin bunu indiyədək görməmişik. Hələ iki il öncə elan edilmişdi ki, "Kərrar" pilotsuz təyyarəsinin raket daşıma qabiliyyəti var. Lakin həqiqətən də bu pilotsuz təyyarələrin raket daşıma qabiliyyətinin olduğunu dəqiq demək mümkin deyil", - Aryan bildirib.
Aprelin 18-i İran Silahlı Qüvvələri Günüdür. Bu münasibətlə Tehranda hərbi parad keçirilib. Hərbi paradda yeni zirehli personal daşıma vasitələrinin, yeni helikopter simulyatorunun, həmçinin hərbi telekommunikasiya sahəsində yeni nailiyyətlərin və "Səyyad 40" telekommunikasiya sisteminin təqdimatı keçirilib. Hərbi paradda ilk dəfə olaraq "Hazim 3", "Ababil", "Şahid 129", "Səril" pilotsuz təyyarələri, "Ya Zəhra 3", "Mirsad 3" hava müdafiəsi sistemləri nümayiş etdirilib.
Arin həmçinin deyib ki, İranın pilotsuz təyyarələr sahəsində potensialını ona təhlükə yarada biləcək ölkələrin bu sahədəki potensialı ilə müqayisə etmək lazımdır. "Hazırda bu təhlükə İran üçün regionda ABŞ və İsrail tərəfindəndir. ABŞ-ın pilotsuz təyyarələr sahəsindəki gücü isə göz qabağındadır", - o bildirib.
İranın istehsal etdiyi pilotsuz təyarələr fotoçəkiliş aparmaq, əməliyyat yerindən canlı kadrlar ötürmək, hava şəraiti və meteoroloji sahədə, balıq ovu və digər sahələrdə yüksək qabiliyyətə malikdir.