Bakı. Elçin Mehdiyev – Trend:
Avropa Şurası Parlament Assambleyası (AŞ PA) qəbul etdiyi “Ermənistan və Azərbaycan arasında münaqişənin humanitar nəticələri” adlı hesabatda növbəti dəfə qərəzli mövqe nümayiş etdirib.
Məlumdur ki, 44 günlük Vətən müharibəsində tarixi Zəfərdən sonra Azərbaycan regionda yeni reallıqların yarandığını bəyan edərək yeni “3+3” əməkdaşlıq formatı təşəbbüsünü irəli sürüb və Ermənistanın da bu formata qoşularaq yeni yaranmış əməkdaşlıq mühitindən faydalana biləcəyini bəyan edib. Bununla yanaşı, Azərbaycan Ermənistana sülh sazişinin imzalanması təşəbbüsü ilə çıxış edib, regionda kommunikasiyaların açılması üçün zəruri tədbirlər görüb. Lakin Ermənistan həmişəki kimi qeyri-konstruktiv mövqe nümayiş etdirərək bu təşəbbüslərə müsbət cavab verməkdən imtina edir və regionda sülhün bərqərar olmasına əngəllər yaradır.
Lakin AŞ PA-nın hesabatında Azərbaycanın xoşməramlı təşəbbüsləri görməzdən gəlinir, Ermənistanın qeyri-konstruktiv mövqeyi isə ört-basdır edilir.
Bununla yanaşı, AŞ PA-nın hesabatında qeyri-qanuni olaraq "Dağlıq Qarabağ" ifadəsindən istifadə edilir. Azərbaycan dəfələrlə bəyan edib ki, artıq "Dağlıq Qarabağ" adlı ərazi vahidi yoxdur və Prezident İlham Əliyev Qarabağ iqtisadi rayonun yaradılması ilə bağlı sərəncam imzalayıb. Bu nöqteyi-nəzərdən AŞ PA-nın "Dağlıq Qarabağ" ifadəsindən istifadə etməsi Azərbaycanın ərazi bütövlüyünə qarşı hörmətsizlik hesab edilə bilər.
Məsələ ilə bağlı Trend-ə açıqlama verən Milli Məclisin deputatı Elman Nəsirov deyib ki, AŞ PA-nın post-münaqişə dövrünün yeni reallıqları fonunda qəbul etdiyi sənəd təəccüb və təəssüf doğurur.
Deputat bildirib ki, münaqişə artıq bitib, Azərbaycan yeni reallıqlar yaradıb və bu yeni reallıqları beynəlxalq birlik qəbul edir və tanıyır: “Ancaq AŞPA-nın qəbul etdiyi sənədin məzmunu ilə tanış olduqda bu qənaətə gəlmək olur ki, AŞPA təmsilçilərinin sanki 44 günlük müharibədən xəbərləri yoxdur və Azərbaycanın Vətən müharibəsində tarixi qələbəsindən məlumatsızdılar.
Aszərbaycan Prezidenti cənab İlham Əliyev BMT kürsüsündən son çıxışında bir daha vurğuladı ki, artıq beynəlxalq təşkilatlar Azərbaycanın inzibati ərazi vahidləri ilə bağlı danışarkən bu zaman yeni reallıqları qəbul etməlidirilər və artıq Dağlıq Qarabağ adlı ərazi vahidi yoxdur. Cənab Prezidentin 7 iyul tarixli sərəncamı ilə Qarabağ iqtisadi rayonu var. Bu reallıq fonunda AŞPA-nın qəbul etdiyi sənəddə yenə də Dağlıq Qarabağ ifadəsindən edilib ki, bu da tamamilə qəbuledilməzdir.
AŞPA humanitar məsələlərdən bəhs edərkən qeyd edir ki, Dağlıq Qarabağ ərazisinə siyasilərin gəlişinə Azərbaycan şərait yaratmalıdır. Bu fikir kökündən yalnışdır. Qarabağ iqtisadi rayonu var və Qarabağa kim gəlirsə onun sahibi olan Azərbaycandan icazə almalıdır və gəlişinin səbəbini bildirməlidir. Azərbaycanın icazəsi olmadan heç kim Qarabağ ərazisinə gələ bilməz”.
E.Nəsirov vurğulayıb ki, AŞPA təmsilçiləri bu davranışları ilə beynəlxalq hüquqa zidd addım atmış olurlar.
Məsələyə münasibət bildirən Milli Məclisin deputatı Asim Mollazadə isə vurğulayıb ki, bir sıra beynəlxalq təşkilatlarda, o cümlədən AŞ PA-da çox güclü erməni lobbisi var: “Bir sıra ölkələrin nümayəndələri hətta Ermənistan nümayəndələri kimi danışırlar. Burada erməni lobbisinin fəaliyyəti göz qarşısındadır. Bundan əlavə, Türkiyəfobiya, islamafobiya da öz təsirini göstərir.
Bir məsələni xüsusilə qeyd etmək istərdim. 30 ilə yaxın bir müddət ərzində Azərbaycan əraziləri erməni işğalı altında oldu, yüz minlərlə azaərbaycanlı öz doğma yurd-yuvalarından didərgin düşdü, minlərlə mülki şəxslər, qadınlar, uşaqlar ermənilər tərəfindən vəhşicəsinə qətlə yetirildi. Ancaq bu təşkilatların heç birinin səsi çıxmırdı. BMT-nin qətnamələri kağız üzərində qaldı, Minsk qrupu 30 ilə yaxın müddət ərzində diplomatik turizm kimi münaqişəni dondurmaqla məşğul olub, münaqişənin həllində heç nəyə nail olmayıb.
Bu gün artıq münaqişə geridə qalıb, Azərbaycan 44 günlük Vətən müharibəsində özü bu məsələni həll edib, işğal altında olan torpaqlarını azad edib və bu tarixi Zəfəri ilə regionda yeni reallıq yaradıb. Azərbaycanın Ermənistana da açıq mesajı var, ərazi iddialarına son qoyub əməkdaşlıq yolunu seçsin və Azərbaycan bu əməkdaşlığa hazırdır. Bununla yanaşı, Azərbaycan bizim vətəndaşlığımızı qəbul edib Azərbaycanda yaşamaq istəyən erməniləri də eyni hüquqlarla təmin etməyi təklif edir.
Ona görə düşünürəm ki, beynəlxalq təşkilatlar bu cür qərəzli hesabatlar verməkdən əl çəkməlidir, artıq bu oyunların zamanı bitib. Yaxşı olardı ki, onlar Ermənistanı konstruktiv mövqeyə gətirsinlər. Onlar bu cür hesabatları ilə sülhə və əməkdaşlığa mane olurlar”.