Ötən ay ərzində Dövlət Sərhəd Xidmətinin (DSX) əməkdaşları tərəfindən həyata keçirilmiş tədbirlər nəticəində qeyri-leqal miqrasiyanın, narkotik vasitələrin keçirilməsinin, qaçaqmalçlığın və digər bu kimi təhlükələrin qarşısı alınıb. Bu barədə məlumat Trend ə DSX-nin məbuat xidmətindən verilib.
Məlumatda göstərilir ki, ötən ay ərzində Ağstafa, Şərur, Qusar rayonlarının ərazilərində aşkar edilmiş 3 ton 170 kq yabanı halda bitmiş çətənə kolları yandırılaraq məhv edilib.
7 iyul 2005-ci il tarixdə Lənkəran rayon Sitəmurov kəndi ərazisində 1 ədəd "RQD-5" və 1 ədəd "F-1" markalı əl qumbarası aşkar olunaraq götürülüb.
Bundan başqa, buraxılış məntəqələrində sərhəd nəzarəti zamanı axtarışda olan 32 nəfər şəxs müəyyənləşdirilərək yaxalanıb. 6 nəfər Azərbaycan, 1 nəfər Qırğızıstan, 1 nəfər Özbəkistan və 1 nəfər Türkiyə Respublikası vətəndaşı saxta sənədlərlə, 58 nəfər müxtəlif ölkə vətənadşları isə müvafiq sənədləri olmadığına görə saxlanılıb.
Həmçinin vizalarının olmamasına görə müxtəlif ölkə vətəndaşları olan 27 nəfər, o cümlədən 6 nəfər Hindistan, 5 nəfər İran İslam Respublikası, 3 nəfər Böyük Britaniya, 2 nəfər Nigeriya, 2 nəfər Pakistan, 2 nəfər Qana, 1 nəfər Livan, 1 nəfər Tunis, 1 nəfər Yəmən, 1 nəfər Əlcəzayir, 1 nəfər Malayziya, 1 nəıər Banqladeş və 1 nəfər İsrail vətəndaşları, şübhəli şəxs qismində 2 nəfər Rusiya Federasiyası, 1 nəfər Azərbaycan Respublikası vətəndaşı və 1 nəfər vətəndaşlığı omlayan şəxs saxlanılaraq barələrində müvafiq tədbirlər görülüb.
Ay ərzində 37 halda dövlət sərhədini pozmağa cəhd edərkən 68 nəfər sərhəd pozucusu qismində tutulub. Sərhəd rejimi qaydalarını pozduqlarına görə 174 nəfər saxlanılıb.
Sərhəddə 61 halda 709 milyon manat dəyərində qaçaqmal aşkar edilib. Belə ki, 22.670 qutu müxtəlif markalı siqaretin, 6.921 litr dizel yanacağının, 450 litr mühərrik yağının, 280 litr benzinin, 150 kq nərə balığının, 80 kq əlvan metalın, 24 ədəd araq və 29 ədəd çaxır məhsulunun, 430 ədəd uşaq oyuncaqlarının, 240 ədəd əl fənərinin, 64 ədəd avtomobil üçün müxtəlif ehtiyat hissələrinin, 1 ədəd təlim qumbarasının, 8,5 qram tiryəkin və 1 qram həşişə oxşar maddənin dövlət sərhədindən qanunsuz keçirilməsinə yol verilməyib.
