"İlkin nəticələrə görə 60-dan çox namizədimiz qeydiyyatdan keçib. Ancaq onların təbliğatı üçün nəzərdə tutulan maliyyə bizə böyük problem yaradıb".
Bu barədə Trend agentliyinə Azərbaycançı Qüvvələr (AQ) Seçki Blokunun rəhbəri Rövşən Əhmədli məlumat verib.
Problemin həlli üçün çıxış yollarının yarandığını deyən R.Əhmədli dövlətdən lazımi qədər yardım ala bilməyəcəklərini yəqin etdiklərini bildirib: "Namizədləri dəstəkləyən qüvvələr onların təbliğatı üçün maliyyə mənbələri tapmalıdır. Biz bu problemi başqa cür aradan qaldıra bilmərik".
Namizədlərin təbliğatı üçün lazımi vəsaitlərin çap olunmasıyla bağlı bir sıra mətbəələrlə danışıqlar aparıldığını deyən R.Əhmədli daha bir açıqlama verib: "Son variantımız blokun ümumi seçki fondunu yaratmaq olacaq. Bu fonda vəsaitin yığılmasına nəzarət ağsaqqallar tərəfindən həyata keçiriləcək".
Yaradılacaq seçki fondundan ayrılan vəsait namizədlər arasında eyni qaydada bölünəcək.
