Sentyabrın 21-də hüquq müdafiəçiləri Azərbaycan Respublikasının Milli Məclisində Qanunvericilik Komissiyasının sədri, eyni zamanda məhbuslarla bağlı işçi qrupunun rəhbəri Əli Hüseynova müraciət edəcəklər. Bu barədə Trend ə hüquq müdafiəçisi Çingiz Qənizadə məlumat verib.
Müraciətə səbəb işçi qrupunun sentyabr ayının iknici yarısına planlaşdırılmış görüşünün hələ də baş tutmamasıdır. "Bilirsiniz ki, göruş sentyabr ayının 16-a təyin edilsə də, baş tutmayıb. Gecikmənin səbəbləri barədə monitorinq qrupunun üzvləri olan hüquq müdafiəçilərinə heç bir məlumat verilməyib.
Biz bir neçə gün səbr etdik və belə qərara almışıq ki, əgər bu gün də göruşün vaxtı müəyyən edilib bizə deyilməsə, sentyabrın 21-də İşçi Qrupunun rəhbərinə rəsmi şəkildə müraciət edəcəyik" - deyə Çingiz Qənizadə bildirib.
Qeyd edək ki, işçi qrupunun ötən aydan planlaşdırılmış və hələ də baş tutmayan 4-cü görüşündə bir qədər əvvəl Avropa Şurasına təqdim olunmuş 107 və 43 nəfərdən ibarət iki siyahı üzrə müzakirələrin aparılması nəzərdə tutulub.
Bu vaxta qədər həmin siyahılar üzrə ümumilikdə 71 nəfər azadlığa buraxılıb. Lakin növbəti iclasda siyahı üzrə hələ də azadlığa buraxılmamış məhbusların taleyinin müzakirəsi və siyahıya yeni məhbusların adlarının əlavə edilməsi gözlənilir.
