"Müxalifət partiyaları üçün hər bir rayon ərazisində aksiyalar keçirmək üçün yerlər ayrılmalıdır. Heç bir meydanı müxalifətin üzünə bağlamaq olmaz". Bu fikirləri Trend ə açıqlamasında Vətəndaş Həmrəyliyi Partiyasının (VHP) sədri, millət vəkili Sabir Rüstəmxanlı bildirib.
O, "Azadlıq" blokunun şəhərin mərkəzində yerləşən iri meydanlarda aksiya keçirmək istəyinə münasibətini bildirərkən deyib ki, müxalifətçilərin istənilən yerdə kütləvi tədbirlər keçirməyə haqqı var. S.Rüstəmxanlı hesab edir ki, siyasi qüvvələrin fəaliyyətinə, onların kütləvi aksiyalar keçirməsinə məhdudiyyətlər qoymaq olmaz. Lakin o, eyni zamanda vurğulayıb ki, müxalifətçilər də bu istəklərində, əməllərində səmimi olmalıdırlar.
"Başqalarının bayraqlarına və rənginə bürünüb meydanlara çıxmaq xalq arasında həmin siyasi qüvvələrə qarşı etimadsızlıq yaradır. Hakimiyyət də, xalq da bu siyasi qüvvələrin fəaliyyətində kənar bir əl olduğunu görəndə onlara inamsız yanaşır, ehtiyat edir. Aksiya keçirmək istəyi başqa ölkənin liderinin plakatını boynundan asıb şəhərin küçələrində gəzmək məqsədi daşıyırsa, bu, əlbəttə, xalqa hörmətsizlikdir"-deyə Sabir Rüstəmxanlı bildirib.
O, qeyd edib ki, kütləvi aksiyalar keçirənlər həqiqətən demokratiyanın, insan haqlarının bərpasını istəməli, yalnız bu mütərəqqi arzular uğrunda mübarizə aparmalıdırlar: "Lakin başqa xalqların, dövlətlərin siyasi təbliğat vasitələrini mənimsəyib, yad ölkənin liderlərini əllərində bayraq edib küçələrə çıxmaq bu istəklə bir-birinə uyğun gəlmir"-deyə "Azadlıq" blokunun iri meydanlarda aksiyalar keçirmək təşəbbüsünə münasibətini bildirən Sabir Rüstəmxanlı vurğulayıb.
Trend-in ən mühüm və maraqlı xəbərlərini "Telegram"da izləyin
.jpg)
