""Azadlıq" seçki blokunun elə bir gücü yoxdur ki, seçki günü qarşıdurma yaratsın". Bu barədə Trend ə hakim Yeni Azərbaycan Partiyasının (YAP) icra katibinin müavini, millət vəkili Mübariz Qurbanlı bildirib.
Qeyd edək ki, "Azadlıq" seçki blokunun rəhbərləri mətbuat vasitəsilə tərəfdarlarına tapşırıq veriblər ki, seçkilərin saxtalaşdırılmasının qarşısını almaq məqsədilə seçki günü - noyabrın 6-da seçki məntəqələri önündə toplaşıb onların göstərişini gözləsinlər.
M.Qurbanlı qeyd edib ki, "Azadlıq" seçki blokunun bu məqsədini həyata keçirməyə cəhd göstərməsi seçki məntəqəlrində çalışanlara təzyiq kimi qiymətləndirilə bilər: "Seçkilərlə bağlı müvafiq qanunlarda da göstərilib ki, seçki günü dairə seçki komissiya üzvləri və seçki məntəqələrində çalışanlara təzyiq göstərmək olmaz. Görünür radikal müxalifət seçkilərdə məğlubiyyətlərini sığortalamaqdan ötrü bu planı həyata keçirmək barədə fikirləşirlər".
YAP rəsmisi onu da bildirib ki, hakimiyyət ölkədə qarşıdurma yaratmağa və seçkiləri pozmağa cəhd göstərən istənilən qüvvənin qarşısını almağa qadirdir.