Ötən il Salyanda fermer təssərüfatlarına kömək məqsədilə, bir sıra əsaslı tədbirlər həyata keçirilib. Trend in bölgə müxbirinin məlumatına görə, Qarabağlı inzibati ərazisində 18 vahid kənd təsərrüfatı texnikası ilə təchiz olunan "Halal" aqroservis yaradılıb ki, bu da sahibkarların texnikaya olan tələbatını xeyli yaxşılaşdırıb. Rayonda kənd təsərrüfatı bitkilərinin suvarılmasının həyata keçirilməsi üçün 47 nasos stansiyası, 147 nasos aqreqatı vardır. 2088 km uzunluğunda olan kollektor-drenaj şəbəkəsinin 245 km-də təmizləmə işləri aparılıb. Gündəlik emal gücü 30 ton olan süd emalı zavodunun bərpası 2006-cı ilin fevral ayınadək başa çatdırılacaq, ərazilərdə 6 süd qəbulu məntəqələri tikiləcək.
Pambıqçılığın inkişafını surətləndirmək məqsədilə rayonun Qızılağac inzibati ərazisində "Şəki-ipək" Açıq tipli səhmdar cəmiyyətinin pambıq qəbulu və emalı zavodunun tikintisinə start verilib. Heyvandarlığın intensiv üsullarla inkişafını, damazlığın yaxşılaşdırılmasını təmin etmək məqsədilə rayonun Qaraçala və Xalac inzibati ərazilərində süni mayalanma məntəqələri yaradılmış, xüsui mülkiyyətə əsaslanan damazlıq təsərrüfatının inkişafı üçün əsaslı tədbirlər həyata keçirilib.
Bitkilikdə emal sənayesinin inkişafı məqsədilə "Hacı Camalxan" fermer-kəndli təsərrüfatında beynəlxalq standartlara cavab verən konserv məhsulları sexi yaradılmış və hal-hazırda tam gücü ilə fəaliyyət göstərir. Artıq 2006-cı ilin ilk günləri başlanıb. Rayonda 423 fermer-kəndli təsərrufatında, ailə kəndli təsərrüfatlarında bitkiçilik, heyvandarlıq və yemçilik məhsulları istehsalının dinamik inkişafını təmin etmək üçün zəruri tədbirlər həyata keçirilir.