Ötən üç ay (yanvar, fevral, mart) ərzində Gəncə şəhərində 16 yanğın hadisəsi qeydə alınıb. Onlardan 9-u ziyanlı, 7-si isə ziyansız olub. Hadisələrin 11-i xüsusi yaşayış evlərində baş verib. Bu barədə məlumatı Gəncə şəhər Yanğın Təhlükəsizliyi Şöbəsi Nəzarət Bölməsinin rəisi Təvəkkül Verdiyev verib.
Onun sözlərinə görə, yanğınlar nəticəsində əhaliyə təxminən 17 600 AYM məbləğində ziyan dəyib. Bu isə ötən illə müqayisədə yüksək rəqəmdir. Belə ki, 2005-ci ilin eyni dövrü ilə müqayisədə yanvar fevral və mart aylarında Gəncədə 9 yanğın hadisəsi baş verib və bunun nəticəsində təxminən 1000 AYM məbləğində ziyan dəyib. Verdiyev bildirib ki, yanğıların əsas səbəbləri təhlükəsizlik qaydalarına riayət etməmək, həmçinin məişət texnikasından istifadə qaydalarını pozmaq olub.
