Müsavat Partiyasının Məclisində təmsil olunmaq üçün partiyanın III qurultayına hazırlıq üzrə Təşkilat Komitəsinə 60 ərizə daxil olub. Bu barədə Trend ə Təşkilat Komitəsinin sədri, Müsavat Partiyası sədrinin birinci müavini Vurğun Əyyub bildirib.
Qeyd edək ki, Müsavat Partiyasının növbəti qurultayı mayın 29-da keçiriləcək. Partiyanın seçkili orqanlarına namizədlərin irəli sürülməsi prosesi mayın 20-də başa çatacaq.
V.Əyyub bildirib ki, partiyanın Məclisində təmsil olunmaq üçün təşkilat komitəsinə 60 ərizə daxil olub. Bu ərizələrin əksəriyyəti kişilər tərəfindən yazılıb. Mərkəzi Nəzarət Təftiş Komissiyasına və partiya başqanlığına namizədliklərin isə hələ qeydə alınmadığını söyləyən V.Əyyub hazırda Təşkilat Komitəsinin texniki işlərlə məşğul olduğunu bildirib.
