"Azərbaycanda Yaşıllar Partiyası adı altında mövcud olan partiya tanımıram və "yaşıllar" ideologiyasını özündə əks etdirən partiyanı biz yaradacağıq". Bu fikirləri Trend ə açıqlamasında Yaşıllar Partiyasının yaradılması üzrə Təşəbbüs Qrupunun üzvü Mais Güləliyev bildirib.
Qeyd edək ki, Mais Güləliyevin rəhbərliyi ilə bir neçə şəxs mətbuat konfransı keçirərək Yaşıllar Partiyasını təsis edəcəklərini, bunun üçün artıq Təşəbbüs qrupu yaratdıqlarını bəyan ediblər. Azərbaycanda 1993-cü ildə yaradılmış və hazırda sədri Elmar Qafarov olan Yaşıllar Partiyası isə bu bəyanatlara etiraz edib. Elmar Qafarov eyniadlı partiyanı yaradacağını bəyan edən Mais Güləliyevi siyasi etikasızlıq göstərməkdə ittiham edib. O, bildirib ki, 1989-cu ildə Azərbaycanda Yaşıllar Hərəkatı başlayıb, 1993-cü ildə siyasi partiyaya çevrilib və sədri keçmiş ekologiya naziri Arif Mansurov olub. O, vəfat etdikdən sonra 2002-ci ildən isə həmin partiyaya Elmar Qafarov və mərhum sədrin həyat yoldaşı Cəmilə Mansurova rəhbərlik ediblər. Elmar Qafarovun sözlərinə görə, Yaşıllar Partiyasının mövcud olması Azərbaycan ictimaiyyətinə, həmçinin M.Güləliyevə bəllidir və bu partiya müxalifət düşərgəsində Demokratik Blokun üzvü, "Bizim Azərbaycan" blokunun həmtəsisçisi olub. Hazırda partiya "Bizim Azərbaycan" blokunda təmsil olunur.
Bu fikirlərlə bağlı mövqeyini açıqlayan Mais Güləliyev isə bildirib ki, həmin partiya artıq heç bir fəaliyyət göstərmir və onun mövcudluğu cəmiyyətə də məlum deyil: "Mən o partiyanı tanımıram, heç bir fəaliyyətini də görmürəm. Həmin partiya 2003-cü ildə prezident seçkisində İsa Qəmbərin namizədliyini dəstəkləmək üçün yaradılmış "Bizim Azərbaycan" blokunda təmsil olunan sağ təmayüllü partiya olub "-deyə M.Güləliyev vurğulayıb.
O əlavə edib ki, oktyabrın birinci ongünlüyündə yeni Yaşıllar Partiyasının təsis qurultayı keçiriləcək və özü sədrliyə namizədliyini verəcək. Onun sözlərinə görə, bu partiya özünü Avropa Yaşıllar Partiyasının səviyyəsinə, prinsiplərinə, fəaliyyət istiqamətlərinə uyğunlaşdıracaq, Azərbaycanda sol təmayüllü, sosial ədalətin, ekologiyanın, ətraf mühitin qorunması, insan haqlarının müdafiəsi, demokratiyanın inkişafı kimi prinsiplərə xidmət göstərən bir partiya olacaq.
