Ekoloji Təmiz Kənd təsərrüfatı məhsullarının sərgisində qərb və şimal-qərb bölgəsindən olan fermerlər iştirak edəcək. Bu barədə məlumatı Trend in qərb bürovuna sərginin təşkilatçısı, Gəncə Aqrobiznes Asosiyasiyasının prezidenti Amin Babayev verib.
Onun sözlərinə görə, sərgidə tərəvəz, meyvə, bal və digər məhsullar sərgilənəcək. Babayev bildirdi ki, bunlardan başqa emal məhsullarından olan moruq, böyürtikən, itburnu və s. şirələri də nümayiş olunacaq.
A.Bababyev bildirdi ki, sərgidə satış olmayacaq. "Məqsədimiz həqiqətən də ekoloji cəhətdən təmiz kənd təsərrüfatı məhsulları becərilməsinin mümkünlüyünü insanlara çatdırmaqdır" - deyən Amin Babayev onu da əlavə etdi ki, sərginin sonunda xeyriyyəçilik məqsədi ilə məhsullar imkansızlara pulsuz paylanacaq.
Qeyd edək ki, Ekoloji Kənd təsərrüfatı məhsullarının sərgisi Gəncənin 2500 illik yubileyi münasibətilə təşkil olunacaq.
