Azərbaycanda İxracın və İnvestisiyanın Təşviqi Fondu - AZPROMO Gəncə şəhərində Qərb reqionunun iş adamları, fermerləri və biznesmenləri üçün seminar təşkil edib. TACIS proqramı çərçivəsində keçirilən tədbirdə Gəncə ilə yanaşı, 7 rayondan 60-a yaxın nümayəndə iştirak edib. Bu barədə Trend in Qərb Bürosuna məlumatı fondun baş məsləhətçisi Emil Zeynalov verib.
Onun sözlərinə görə, hazırda iş adamları, eləcə də fermerlər üçün məhsullarının ixrac bazarlarını tapmaları və əlaqələrin qurulmasının təşkil olunması çox mühüm məsələlərdəndir. Elə bunu nəzərə alan fondun əməkdaşları yerlərdə bu kimi seminarlar keçirirlər. Seminarı TACIS layihəsinin Çexiyalı mütəxəsisləri Robert Peyzaq və Yana Falaxova aparırdı.
Tədbirdə "Avropa Birliyinə məhsulları necə ixrac etmək mümkündür?", "Rusiyaya və digər qonşu ölkələrə necə məhsul ixrac etmək olar?", "Azərbaycan qanunvericiliyində ixrac sahəsi" və digər maraqlı mövzular öz əksini tapıb.
Növbəti belə seminarın Qubada keçiriləcəyi planlaşdırılır.