Gəncənin Şah İsmayıl Xətai prospektində etiraz aksiyası keçirilib. Trend Qərb Bürosu xəbər verir ki, etirazı şəhərin Zülfi Hacıyev küçəsinin sakinləri keçirib.
Sakinlər yaşadıqları küçədə təbii qazın verilişinin dayandırılmasına etiraz olaraq prospektdə avtomobillərin hərəkətini dayandırıblar. Aksiya yerinə Gəncə şəhər İcra Hakimiyyəti başçısının müavini Şahmalı Cavadov və şəhər Qaz İstismarı İdarəsinin baş mühəndisi Yusif Xıdırov gəlib. İdarə rəsmisi bildirib ki, bü küçədə istifadə edilən mavi yanacağın dəyərinin ödəniş faizi çox aşağıdır. "Sakinlər istifadə etdikləri mavi yanacağın pullarını vermək istəmirlər. Elə evlər var ki, 1 ildən artıqdır ki, bir manat da pul ödəməyib. Məhz buna görə də idarə onların qaz borularını kəsib" - deyə Yusif Xıdırov söyləyib.
Etiraz aksiyası keçirən sakinlər isə bildiriblər ki, küçədə qaz pullarının yığım faizi aşağı olsa da, ödəniş pullarını tam vaxtı-vaxtında verənlər də var.
İcra başçısının müavini Şahmalı Cavadov isə sakinlərə istifadə etdikləri mavi yanacağın dəyərini vaxtında ödəmələrini xahiş edib. Və qeyd edib ki, əgər belə olmazsa, pul verməyən abonentlərin qazları yenidən kəsiləcək.
Aksiyadan bir neçə saat sonra Zülfi Hacıyev küçəsinə qazın verilişi bərpa olunub.