Gəncə Qaz İstismarı İdarəsi, şəhər İcra Hakimiyyəti və Polis İdarəsi qaz pullarının yığımı ilə bağlı dövlət məmurlarının evlərində reyd keçirib. Qaz İstismarı İdarəsindən Trendə xəbər verilib ki, reyd 30-a yaxın məmurun evində aparılıb.
Onların sırasında məktəb direktorları, poliklinika və xəstəxanaların baş həkimləri, sosial müdafiə mərkəzlərinin rəhbərləri, elmi-tədqiqat institutlarının direktorları və s. məmurlar olub. Gəncə Qaz İstismarı İdarəsinin rəisi Ramiz İsmayılov Trendə bildirib ki, məmurların əksəriyyətinin idarəyə 100 YAM-dan çox borcu var. Bir neçə dəfə onlara müraciət olunsa da, borclarını ödəmək istəməyiblər.
"Azəriqaz QSC-dən Gəncə Qaz İstismarı İdarəsinə rəsmi məktub gəlib, əgər noyabrın 21-ə kimi borclardan müəyyən qədər yığılmasa, şəhərə verilən təbii qaz dayandırıla bilər" - deyən R. İsmayılovun sözlərinə görə, belə reydlərin keçirilməsi məqsədəuyğundur. İdarə rəisi qeyd etdi ki, məmurların əksəriyyəti yaşadıqları evlərin qapılarını idarə işçilərinin üzünə açmaq istəmirlər.
Qaz İstismarı İdarəsindən verilən məlumata görə, artıq məmumrların bir qismi reyddən sonra borclarını ödəməyə başlayıblar.
