"Batabat" Astrofizika Rəsədxanası bərpa olunur. Trend in Naxçıvan Bürosu xəbər verir ki, bununla əlaqədar rəsədxananın fəaliyyəti müvəqqəti olaraq dayandırılıb.
Ərazidə bərpa işlərini "Gəmiqaya" Tikinti Şirkəti həyata keçirir. Bərpa və yenidənqurulma tədbirlərinə iki mərtəbədən ibarət inzibati binanın əsaslı tikintisi, mövcud avadanlıqların müasir tələblərə uyğun təmir olunması aid edilib.
"Batabat" Astrofizika Rəsədxanasının direktoru Qulu Həziyev Trend ə bildirib ki, bərpa müddəti ərzində bir ədəd teleskop Ukraynanın "Krım" rəsədxanasında təmir olunub. İşlər başa çatandan sonra növbəti mərhələdə Ordubad rayonunda "Ağdərə" stansiyasının da əsaslı təmir olunması nəzərdə tutulub.
Qeyd edək ki, adıçəkilən rəsədxana 1970-ci ildə Şamaxı Astrofizika Rəsədxanasının tərkibində yaradılıb. 2002-ci ildə AMEA-nın yaradılması ilə "Batabat" Astrofizika Rəsədxanası müstəqil olaraq fəaliyyət göstərir.
...