"Mən 90-ci illərin əvvəllərində cəbhə bölgəsində yerləşən rayonlara tez-tez səfərlər edirdim və indi Azərbaycan Silahlı Qüvvələrinin neçə sürətlə inkişaf etdiyini öz gözlərimlə gördüm". Trend in məlumatına görə, Ağdam rayonuna səfər edən deputat qrupunun üzvü Vahid Əhmədov jurnalistlərlə söhbətində belə deyib.
V.Əhmədov xatırladıb ki, may ayında bir qrup millət vəkili Beyləqan və Füzuli rayonlarındakı hərbi hissələrə də baş çəkiblər. Onun fikrincə, Ağdamdakı hərbi hissələrin vəziyyəti daha yaxşıdır.
"Bütün bunlar Azərbaycan prezidenti İlham Əliyevin Silahlı Qüvvələrin formalaşmasına, onun müasir satandartlara uyğunlaşdırılmasına, maddi -texniki bazasının gücləndirilməsinə göstərdiyi qayğının nəticəsidir" - deyə millət vəkili bildirib.
V.Əhmədovun fikrincə, bəzi mətbuat orqanlarında ordu ilə bağlı dərc olunan yazıların əsası yoxdur. "Bəziləri iddia edirlər ki, Azərbaycan Silahlı Qüvvələri qapalı sistemdir və orada baş verənlər gizli saxlanılır. Lakin biz bir qrup millət vəkili artıq ikinci dəfədir ki, cəbhə bölgəsinə səfər edirik və ermənilərlə üzbəüz dayanan hərbi hissələrə baş çəkirik. Biz Ağdam cəbhə bölgəsinə səfər edən zaman ermənilərlə 150 metr məsafədə dayanan zabit və əsgərlərlə görüşdük və düşmənin mövqelərini müşahidə etdik. Əsgərlərimizlə birlikdə nahar etdik, dərdləri ilə maraqlandıq. Ordu komandirləri heç nəyi gizlətmək fikrində deyillər. Bütün bunlar isə onu deməyə əsas verir ki, Silahlı Qüvvələr Azərbaycan xalqı üçün açıqdır və xalqın istənilən nümayəndəsi ordudakı vəziyyətlə maraqlana və bu barədə məlumat ala bilər".
V.Əhmədov orduda belə bir şərait yaratdıqlarına görə müdafiə naziri, general-polkovnik Səfər Əbiyev və Bərdədə yerləşən "N" saylı hərbi hissənin komandiri, general-mayor Nizam Osmanova millət vəkilləri adından təşəkkürünü bildirib.
Xatırladaq ki, Ağdam rayonunda yerləşən cəbhə bölgəsinə səfər edən deputat qrupuna millət vəkilləri Elmira Axundova, Lalə Abbasova, Vahid Əhmədov, Fəzail Ağamalı, Aydın Abbasov və Tahir Rzayev daxil idi.