2006-cı il ərzində - bələdiyyələrin bir illik fəaliyyəti dövründə onların bir sıra problemləri yenə də öz həllini tapmadı. Bu barədə Trend ə Azərbaycanda Vətəndaş Cəmiyyətinin İnkişafına Yardım Assosiasiyasının eksperti Vüqar Tofiqli açıqlama verib.
Bələdiyyələrin fəaliyyətinə dair 2006-cı ilin yekunlarını təhlil edən ekspert bildirib ki, ümumilikdə ötən yeddi il ərzində Azərbaycanda bələdiyyələr yerli orqan kimi formalaşa biliblər: "Artıq hər bir bələdiyyə orqanı sərbəst fəaliyyət göstərmək imkanı qazanıb. İstər büdcə gəlirlərində, istərsə də fəaliyyət istiqamətlərində irəliləyiş hiss olunmaqdadır. Belə ki, bələdiyyələrin aylıq büdcə gəliri 250 (2002-ci il) manatdan 780 (2006-cı il) manata çatıb"-deyə V.Tofiqli bildirib.
Onun sözlərinə görə, 2006-cı ildə bələdiyyələr üçün ən vacib məqam dövlət orqanlarının, xüsusən də Prezidentin İcra Aparatının bu orqanlara əvvəlki illərlə müqayisədə daha çox diqqət ayırmasıdır. İl ərzində regionlarda seminarlar keçirilib, bələdiyyə assosiasiyaları yaradılıb.
V.Tofiqli eyni zamanda hesab dir ki, bu il bələdiyyələrin çoxsaylı problemləri də öz həllini tapmadı. Belə ki, dövlət əmlakının bələdiyyə qurumlarına verilmə prosesi hələ də başa çatdırılmayıb. Təhlillər göstərir ki, qanunvericilikdəki boşluqlar bu il də aradan qaldırılmayıb. Ekspert qeyd edib ki, bələdiyyələrin fəaliyyətinə inzibati nəzarəti həyata keçirən orqan - Ədliyyə Nazirliyinin bələdiyyələrlə iş mərkəzinin həm fəaliyyət istiqamətlərinin, həm də statusunun artırılaraq dövlət komitəsinə çevrilməsi məqsədəuyğun sayılan məqamlardandır.
