Yanvarın 27-də Azərbaycan Demokrat Partiyası (ADP) Ali Məclisinin növbəti iclası keçiriləcək. Bu barədə Trend ə ADP-dən məlumat verilib.
ADP Ali Məclisi Rəyasət Heyətinin iclasında bu barədə qərar qəbul edilib. Ali Məclisin növbəti iclasında partiyanın növbəti qurultayının çağırılması, ADP-nin cari il üçün fəaliyyət planının müəyyənləşdirilməsi və digər məsələlərin müzakirəsi planlaşdırılır.
ADP-dən həmçinin bildirilib ki, Avropa Məhkəməsi partiya sədrinin birinci müavini Sərdar Cəlaloğlunun iddiasına baxıb. Yanvar ayının birinci ongünlüyündə Avropa Şurasının Mətbuat Xidmətinin yaydığı press relizdə Avropa İnsan Haqları Məhkəməsinin yaxın dövrdə baxacağı konkret məhkəmə işlərinin siyahısı verilib. Həmin siyahıda ADP funksioneri S.Cəlaloğlunun Azərbaycan dövlətinə qarşı qaldırdığı iddia da yer alıb. Qeyd edək ki, S.Cəlaloğlu 2003-cü il prezident seçkilərindən sonra qeyri-qanuni olaraq həbs edilməsi və ona qarşı işgəncələrin tətbiq olunması ilə əlaqədar Avropa İnsan Haqları Məhkəməsinə müraciət etmişdi.