Bu ilin mayından başlayaraq Gəncə və Şəkinin sü təchizatı və kanalizasiya sisetmi yenidən qurulacaq. Bu barədə məlumatı Trendə Gəncə şəhər "Su Kanal" Törəmə Tipli Səhmdar Cəmiyyətin rəisi Teyyub Cəfərov verib.
Müsahibin sözlərinə görə, Almaniya və İsveçrə hökümətinin Azərbaycanla birgə həyata keçirdiyi bu layihəni başlamaq üçün tenderin müəyyənləşməsi qalıb. Tenderin qalibi müəyyən olunan kimi su və kanalizasiya sisteminin bərpasına başlanılacaq.
"Artıq layihənin smeta dəyərləri məlumdur. Ümid edirik ki, 2008-ci ilin sonunadək sözügedən bərpa və yenidənqurma işləri sona çatacaq". T. Cəfərov qeyd etdi ki, layihənin başlanğıcında Gəncə əhalisinin istifadə etdiyi su anbarlarına Göygöldən yeni su xətti çəkiləcək.
Bildirək ki, dövlətlərarası əməkdaşlıq çərçivəsində Almaniyadan gələn mütəxəssislər 2002-ci ildən etibarən Gəncə şəhərinin su və kanalizasiya sistemləri ilə bağlı araşdırmalar apardıqdan sonra sözügedən systemlərin 60 faizinin yeniləşdirilməsi qərara alınmışdı. Bu yöndə Almaniyanın İnkişaf Bankı və İsveçrənin İqtisadi məsələlər üzrə Katibliyi ilə Azərbaycan hökuməti arasında razılaşma ötən il avqustun 30-da Bakıda imzalanıb.
Sözü gedən layihənin büdcəsi 55 milyon avrodur. Əldə olunmuş razılaşmaya əsasən, Almaniyanın İnkişaf Bankı 37 milyon avro məbləğində kredit, İsveçrənin Katibliyi isə 10 milyon avro qrant verib. Layihədə Azərbaycan hökümətinin payı isə 8 milyon avrodur.
