İlyas İsmayılovun rəhbərlik etdiyi müxaliyətyönlü Ədalət Partiyası ilə Əhməd Orucun sədri olduğu Azadlıq Partiyasının birləşməsi üçün işçi qrup yaradılıb. Trend in məlumatına görə, bu barədə jurnalistlərə Ədalət Pratiyasının sədri, millət vəkili İlyas İsmayılov bildirib.
Onun sözlərinə görə, hər iki partiyanın rəhbərliyi bu məsələ ilə bağlı görüş keçiriblər. Görüşdə Ədalət və Azadlıq partiyalarının Siyasi Şurasının üzvləri iştirak ediblər və iki partiyanın birləşməsi məsələsi müzakirə olunub.
İ.İsmayılov bildirib ki, hər iki partiyanın rəhbərliyi birgə fəaliyyət göstərməkdə maraqlıdırlar.
Xatırladaq ki, yaradılan işçi qrupda hər iki partiyanın nümayəndələri təmsil olunurlar.
İ.İsmayılovun sözlərinə görə, birləşmədən sonra partiyaların hansı ad altında fəaliyyət göstərəcəkləri hələlik məlum deyil.
Ədalət Partiyasının sədri rəbərlik etdiyi təşkilatın Fazil Qəzənfəroğlunun sədri olduğu Böyük Quruluş Partiyası ilə birləşəcəyi haqqında məlumatları təkzib edib.
Xatırladaq ki, Azərbaycanın sabiq baş prokuroru İlyas İsmayılovun rəhbərlik etdiyi müxalifətyönlü Ədalət Partiyası 1995-ci ildə yaradılıb. İ.İsmayılov Milli Məclisin deputatıdır.
Müxalifətyönlü Azadlıq Partiyası da 1990-cı illərin əvvəllərində yaradılıb. Partiyanın sədri Əhməd Orucdur.
