...

DAK sədri: "Çöhrəqanlının BMT-də Dövlətləri Olmayan Millətlər Təşkilatında Güney Azərbaycanı təmsil etməsini müsbət qarşılayıram"

Siyasət Materials 8 Fevral 2007 12:45 (UTC +04:00)

"Güney Azərbaycanın BMT-də Dövlətləri Olmayan Millətlər və Xalqlar Təşkilatına üzv qəbul edilməsini müsbət hadisə kimi qiymətləndirirəm". Bu fikirləri Trend ə açıqlamasında Dünya Azərbaycanlıları Konqresinin (DAK) sədri Cavad Derəxti bildirib.

C.Derəxti qeyd edib ki, BMT-nin nəzdindəki Dövlətləri Olmayan Millətlər və Xalqlar Təşkilatında Güney Azərbaycanın da təmsil olunması üçün Güney Azərbaycan Milli Oyanış Hərəkatının (GAMOH) göstərdiyi səyləri alqışlayır: "BMT nəzdindəki həmin təşkilata Güney Azərbaycan xalqının da daxil edilməsindən çox məmnunam. Ancaq biz daha çox çalışmalıyıq, hər yerə gedib öz problemimizi çatdırmalıyıq. GAMOH lideri Mahmudəli Çöhrəqanlının da Güney Azərbaycan adından həmin təşkilatda təmsil olunmasını müsbət qarşılayıram. Lakin biz yalnız bir məsələni qəbul etmirik, bu da orada qaldırılan bayraqdır"-deyə C.Derəxti qeyd edib.

DAK sədri bildirib ki, Azərbaycan Respublikasının dövlət bayrağına oxşayan həmin üçrəngli bayraq GAMOH-un bayrağıdır. Yəni, təşkilatın bayrağı millətin bayrağı kimi təqdim olunmamalıdır: "Ancaq dostlarımız bildirirlər ki, bunu Güney Azərbaycanın bayrağı kimi qəbul ediblər. Biz bununla razılaşmırıq, çünki Azərbaycanın iki yox, bir bayrağı olmalıdır. Azərbaycan xalqı və ölkəsi birdir, sadəcə onun Quzeyi və Güneyi var. Quzey Azərbaycan öz müstəqilliyini əldə edib, lakin Güneyi hələ də əsarətdədir"-deyə C.Derəxti vurğulayıb.

Qeyd edək ki, hər iki təşkilat - DAK və GAMOH Güney Azərbaycanın istiqlaliyyəti, güneyli soydaşlarımızın hüquqları uğrunda mübarizə aparır. Lakin uzun illərdir bu qurumlar və onların rəhbərləri arasında narazılıqlar hökm sürür.

Xəbər lenti

Xəbər lenti