Azərbaycan, Bakı / Trend müxbir İ.Əlizadə/ Bu həftə Azərbaycan Demokrat Partiyasının (ADP) qurultaya hazırlıq üzrə Təşkilat Komitəsinin partiyanın keçmiş üzvləri Zəminə Dünyamalıyeva, Akif Şahbazov, Aydın Quliyev, Yaqub Abbasov, Surxay Qocayevə qarşı Nəsimi və Nərimanov rayon məhkəmələrində qaldırdığı iddialar üzrə hazırlıq iclası keçiriləcək. ADP qurultaya hazırlıq üzrə Təşkilat Komitəsinin sədri Sərdar Cəlaloğlu bildirib ki, gələn həftə qaldırdıqları iddialar üzrə məhkəmə prosesi başlayacaq.
O qeyd edib ki, partiyanın keçmiş üzvlərinə qarşı Mülkü Prosesual Məcəllənin 149, 150, 223.1-ci maddalərinə əsasən tədbir görülməsi üçün məhkəməyə müraciət edib.
"Onlar hüquqları çatmadığı halda ADP Ali Məclisinin iclası adı altında toplantı keçirməklə partiyanın nüfuzuna zərbə vurublar. Biz onların inzibati qaydada cəzalandırılması və həmin toplantının ADP Ali Məclisinin iclası olmadığı haqqında qərar qəbul olunması üçün iddia qaldırmışıq", -deyə S.Cəlaloğlu qeyd edib.
Qeyd edək ki, müxalifəti təmsil edən ADP hazırda "Azadlıq" siyasi partiyalar blokunun üzvüdür. 1991-ci ildə yaradılmış ADP-nin sədri, Azərbaycanın eks-spikeri Rəsul Quliyev 1996-cı ildən indiyədək mühacirətdə yaşayır. Bir müddət əvvəl partiyada parçalanma baş verib. İndi Rəsul Quliyev və Sərdar Cəlaloğlunun tərəfdarlarından ibarət iki ADP fəaliyyət göstərir.