Azərbaycan, Bakı / Trend müxbir İ.Əlizadə/ Azərbaycan Milli İstiqlal Partiyasının (AMİP) martın 7-də İranın Azərbaycandakı səfirliyi qarşısında keçirməyə cəhd göstərdiyi icazəsiz piket zamanı saxlanılaraq Səbail rayon Polis İdarəsinin 9-cu polis bölməsinə aparılan şəxslər günün sonunda xəbərdarlıq edilərək azadlığı buraxılıb. Bu barədə AMİP sədri Ayaz Rüstəmov məlumat verib.
O qeyd edib ki, piket zamanı 10 nəfər saxlanılıb. Saxlanılanlar arasında 5 nəfər qadın olub və onlar az sonra azad buraxılıblar. 5 nəfər isə bir neçə saat polis ölməsində saxlandıqdan sonra xəbərdarlıq edilərək azadlığa buraxılıb.
AMİP Güney Azərbaycanda yaşayan soydaşlarımızın müdafiəsi məqsədi ilə İranın ölkəmizdəki səfirliyi qarşısında silsilə piketlər keçirir.
Qeyd edək ki, AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir. E.Məmmədov partiyanın lideri, Ayaz Rüstəmov isə sədri vəzifəsini tutur.
