Azərbaycan, Bakı / Trend müxbir İ.Əlizadə/ Sərdar Cəlaloğlunun rəhbərlik etdiyi Azərbaycan Demokrat Partiyasının (ADP) qurultaya hazırlıq üzrə Təşkilat Komitəsinin Nərimanov rayon məhkəməsində partiyanın keçmiş üzvləri Akif Şahbazov, Aydın Quliyev, Zəminə Dünyamalıyeva, Yaqub Abbasov və digərlərinə qarşı qaldırdığı iddia geri qaytarılıb. Bu barədə ADP qurultaya hazırlıq üzrə Təşkilat Komitəsinin üzvü Taliyət Əliyev məlumat verib.
O qeyd edib ki, adıçəkilən şəxslər ADP Ali Məclisinin iclası adı altında qeyri-qanuni toplantı keçiriblər: "Biz bu məsələyə hüquqi qiymət verilməsi və həmin toplantının ADP Ali Məclisinin iclası olmadığı haqda qərar qəbul olunması üçün Nərimanov rayon Məhkəməsinə müraciət etmişdik. Çünki hadisə bu rayonun ərazisində baş vermişdi. Eyni zamanda bu toplantını keçirənlərlə bağlı Səbail məhkəməsində də iddia qaldırmışdıq. Nərimanov rayon Məhkəməsi isə hesab edib ki, bu iddialara bir məhkəmədə baxılsa, daha yaxşıdır. Ona görə də ərizəmizi geri qaytarıblar."
T.Əliyev deyib ki, Səbail rayon Məhkəməsində qaldırdıqları iddia icraata götürülüb və prosesə sədrilk edəcək hakim işlə tanış olur. Gələn həftə iddia üzrə hazırlıq iclasının keçiriləcəyi gözlənilir.
Qeyd edək ki, müxalifəti təmsil edən ADP 1991-ci ildə yaradılıb. Partiya sədri, Azərbaycanın eks-spikeri Rəsul Quliyev 1996-cı ildən indiyədək mühacirətdə yaşayır. Bir müddət əvvəl partiyada parçalanma baş verib və ADP sədr Rəsul Quliyev və onun keçmiş birinci müavini Sərdar Cəlaloğlunun tərəfdarlarından ibarət iki hissəyə parçalanıb. ADP üzv olduğu "Azadlıq" blokundan da xaric olunub.