Azərbaycan, Bakı / Trend müxbir S.İlhamqızı/ Müsavat Partiyası martın 25-də Sumqayıt şəhərində etiraz aksiyası keçirməyi planlaşdırır. Bu barədə partiyanın Mərkəzi İcra Aparatının rəhbəri Arif Hacılı məlumat verib.
Partiya Sumqayıtda bir neçə iri sənaye müəssisəsinin dayandırılması və nəticədə 10 minə yaxın insanın işsiz qalmasına etiraz edir. Aksiyanın keçiriləcəyi yerlə bağlı müzakirələr aparılır. A.Hacılının sözlərinə görə, aksiya Kimyaçılar Sarayının, yaxud sənaye müəssisələrdən birinin qarşısında olacaq. Aksiya ilə bağlı Sumqayıt şəhər icra hakimiyyətinə müraciət hazırlanıb və bu günlərdə təqdim ediləcək.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub.
