Azərbaycan, Bakı / Trend müxbir İ.Əlizadə/ Müsavat Partiyası aprelin 29-da növbəti yürüş-mitinq keçirəcək. Bu barədə məlumat verən Müsavat Partiyası Aparatının rəhbəri Arif Hacılı bildirib ki, yürüş-mitinqə icazə verilməsi üçün bu həftə Bakı Şəhər İcra Hakimiyyətinə müraciət edəcəklər.
"Biz aksiyanı Bakı Metropoliteninin "Həzi Aslanov" stansiyasının qarşısından yürüşlə başlayıb "Ukrayna" meydanında mitinqlə başa çatdırmaq istəyirik", -deyə Arif Hacılı qeyd edib.
Partiya funksioneri vurğulayıb ki, etiraz aksiyasında əsasən sosial problemlərlə bağlı şuarlar və tələblər səsləndiriləcək.
Yürüş-mitinqlə bağlı hazırlıq işlərinə start verdiklərini bildirən A.Hacılı deyib ki, aksiyanın təşkilatçısı Müsavat Partiyası olsa da bura digər partiyalar da qoşula bilərlər.
Qeyd edək ki, müxalifəti təmsil edən Müsavat Partiyası 20-ci əsrin əvvəllərində yaradılıb və 1992-ci ildə yenidən bərpa olunub. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Müsavat Partiyası Milli Məclisdə 5 deputatla təmsil olunur.