Azərbaycan, Bakı /müxbir Trend K. Zərbalıyeva/Cari ilin birinci rübündə daxili işlər orqanlarının 14 əməkdaşı cəzalandırılıb. Onlardan 6-sı daxili işlər orqanlarından xaric edilib. Bu barədə daxili işlər naziri Ramil Usubov Azərbaycan İşgəncələr Əleyhinə Komitənin sədri Elçin Behbudovla görüşündə məlumat verib. Behbudov bazar ertəsi Trend ə verdiyi açıqlamasında bildirib ki, şənbə günü nazirlə görüşündə polis idarələrində işgəncə faktları barədə müzakirələr aparılıb.
Nazir qeyd edib ki, insan hüquqlarını pozduğu üçün ötən il daxili işlər orqanlarının 139 əməkdaşı cəzalandırılıb. Onlardan 35-i orqanlardan xaric edilib.
Polis İdarələrinin Müvəqqəti Saxlanma Təcridxanaları üçün bu il büdcədən 32 min manat məbləğində vəsait ayrıldığını deyən Usubov bu il Xızı, Qobustan və Daşkəsən rayon polis şöbələrinin müvəqqəti saxlanma təcridxanalarının təmir olunub istifadəyə veriləcəyini bildirib.
Nazir Komitədən daxil olan hər bir şikayətin, işgəncə faktının araşdırıldığını və müvafiq tədbirlər görüldüyünü deyib.