Azərbaycan, Bakı / Trend , müxbir S.İlhamqızı/ Noyabrın 17-18-19-da Bakıda keçiriləcək türk dövlət və cəmiyyətlərinin XI dostluq, qardaşlıq və əməkdaşlıq qurultayında 30 ölkədən 550 nəfərədək qonaq iştirak edəcək. Bu barədə çərşənbə axşamı mətbuat konfransı keçirən Xarici Ölkələrdə Yaşayan Azərbaycanlılarla İş üzrə Dövlət Komitəsinin sədri Nazim İbrahimov məlumat verib.
Onun sözlərinə görə, qurultayda Azərbaycan prezidenti İlham Əliyev, Türkiyənin baş naziri Rəcəb Tayyib Ərdoğan, Türkiyənin sabiq prezidenti Süleyman Dəmirəl, türdilli dövlətlərin yüksək hökumət nümayəndələri iştirak edəcəklər. Ümumilikdə 1150 nəfərin iştirakı planlaşdırılır.
Qurultayda Dağlıq Qarabağ münaqişəsi, Şimali Kiprin beynəlxalq təcriddən çıxarılması, İraq və Əfqanıstanda yaşayan türkdilli xalqların vəziyyəti, Ahıska türklərinin vətənlərinə qayıdışındakı problemlər barədə müzakirələr aparılacaq. Qurultay çərçivəsində 6 komissiya fəaliyyət göstərəcək.
XI qurultaya Özbəkistan, Qazaxıstan, Qırğızıstan, Türkmənistan, Tacikistan, Monqolustan, Türkiyə və Azərbaycandan, Rusiyanın Altay, Başqırdıstan, Çuvaşıstan, Dağıstan, Kabardin-Balkar, Tatarıstan, Qaraçay-Çərkəz respublikalarından, Krım, Rumıniya, Bolqarıstan, Kosovo və Yunanıstanın Qərbi Trayka bölgəsində yaşayan türkdilli xalqların nümayəndələri, Kumık, Noqay, Şimali Kipr, Qaqauz, Ahıska türkləri qatılacaqlar.
İbrahimov bildirib ki, XI qurultayın keçirilməsinə Azərbaycan prezidentinin ehtiyat fondundan bir milyon manat vəsait ayrılıb.
Türk dövlət və cəmiyyətlərinin XI dostluq, qardaşlıq və əməkdaşlıq qurultayı 1993-cü ildən bəri keçirilir və indiyədək 10 qurultayın hamısı Türkiyədə keçirilib.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
