Azərbaycan, Bakı, 28 yanvar / Trend , müxbir K.Zərbalıyeva/ Budapeşt şəhər məhkəməsinin hökmü ilə ömürlük azadlıqdan məhrum edilmiş Azərbaycan Silahlı Qüvvələri zabitinin apellyasiya şikayətinə yanvarın 29-da baxılacaq.
Saxlandığı İstintaq Təcridxanasının nəzarətçilərinə tabe olmamaqda ittiham olunan Ramil Səfərova 2006-cı il noyabrın 17-də Budapeştin rayon məhkəməsinin hökmü ilə 8 ay şərti iş verilib. O, bu hökmdən apellyasiya şikayəti verib.
Səfərovun hüquqlarını məhkəmədə macar vəkil Klara Fişşer müdafiə edəcək.
Zabitin ailəsinin nümayəndəsi qismində yeni bir vəkilin işə qoşulacağı barədə razılıq əldə olunsa da, Səfərovun ailəsi ilə vəkil arasında müqavilə imzalanmayıb.
Azərbaycan Ordusunun zabiti Səfərov 2004-cü ilin fevralında erməni zabiti Qurgen Markanyanı qətlə yetirdiyi üçün Budapeşt şəhər məhkəməsinin 13 aprel 2006-cı il tarixli hökmü ilə ömürlük azadlıqdan məhrum edilib. Bu hökmdən verilən apellyasiya şikayəti də təmin olunmayıb.
Azərbaycan zabitinin cəza çəkməsi üçün öz ölkəsinə vertilməsi məsələsi Azərbaycan ədliyyə nazirinin Macarıstana səfəri zamanı müzakirə olunacaq. Onun cəzasını çəkmək üçün öz ölkəsinə verilməsi ilə bağlı Ədliyyə Nazirliyi Macarıstanın Ədliyyə Nazirliyinə müraciət edib.
Səfərov barəsində ikinci məhkəmə hökmü olduğu üçün və bu hökm qanuni qüvvəyə minmədiyi üçün onun Azərbaycana verilməsi prosesi gecikir.