Azərbaycan, Bakı, 20 fevral / Trend , müxbir Q.Cəbiyev/ Azərbaycanın ali təhsil ocaqlarında təqaüdə çıxmış müəllimlərin ixtisara salınması gözlənilir. Bu barədə çərşənbə günü jurnalistlərə Milli Məclisin Elm və təhsil komissiyasının üzvü Abel Məhərrəmov məlumat verib.
Yeni qəbul olunacaq "Təhsil haqqında" qanun layihəsində təqaüdə çıxmış müəllimlərin ixtisara salınmasına dair müddəa əksini tapacaq.
"Təhsil haqqında" qanun layihəsi parlamentdə birinci oxunuşdan keçib. Yaz sessiyasında qanun layihəsinin ikinci oxunuşda müzakirəyə çıxarılacağı nəzərdə tutulur.
Məhərrəmov deyib ki, hər bir universitetin daxili Nizamnaməsi var və təqaüdə çıxmış müəllimlərin ixtisara salınması Nizamnamə ilə qaydaya çalınacaq. "Biz gözləyirik ki, həmin müəllimlərin dövlət tərəfindən təminatına güclü fikir verilsin, yəni təqaüdə çıxarkən aldıqları təqaüd onları dolandıra bilsin. Sonra bu islahatlar həyata keçiriləcək" Məhərrəmov əlavə edib.
