Azərbaycan, Bakı, 21 fevral / Trend , müxbir E.Hüseynli/ BMT-nin Ətraf Mühit Proqramı İdarəedici Şurasının Monakko Knyazlığında keçirilən toplantısında iştirak etmək üçün Azərbaycanın ekologiya və təbii sərvətlər naziri Hüseynqulu Bağırov həmin dövlətə səfər edib. Bu barədə Trend "a Ekologiya və Təbii Sərvətlər Nazirliyinin (ETSN) mətbuat xidmətinin rəhbəri vəzifəsini icra edən İradə İbrahimova məlumat verib.
Fevralın 21-də başlanılan Qlobal ətraf mühiti nazirlərinin forumunun 10-cu əsas sessiyasında iki məsələ müzakirə ediləcək. Toplantıda ətraf mühit və qloballaşma-iqlim dəyişmələri üzrə problemlərin həll edilməsi üçün maliyyə vəsaitlərinin səfərbər edilməsi və beynəlxalq ətraf mühit idarəçiliyi və BMT-nin islahatları məsələləri müzakirə olunacaq.
Məlumata görə, Bağırov bu gün iqlim dəyişmələri üzrə problemlərin həll edilməsi üçün investisiyaların cəlb edilməsi üçün milli siyasətə dair çıxış edəcək.
Sessiya fevralın 22-də başa çatacaq.