Azərbaycan, Bakı, 12 mart / Trend , müxbir K.Ramazanova/ Ötən il Azərbaycanda söz azadlığı ilə bağlı vəziyyət əhəmiyyətli dərəcədə pisləşib. Bu barədə ABŞ Dövlət Departamentinin çərşənbə axşamı gecə yayılan məruzəsində bildirilir.
"Qanun mətbuatda söz azadlığını nəzərdə tutur və senzuranı qadağan edir, lakin təcrübədə Azərbaycan hökuməti çox vaxt bu qaydalara hörmətlə yanaşmır. İl ərzində hökumət KİV-in müstəqilliyini məhdudlaşdıran fəaliyyətlər həyta keçirib" - deyə məruzədə bildirilir.
Məruzədə qeyd olunur ki, jurnalistlər dövlət məmurlarını tənqid etdiyinə görə, məhkəmə təqiblərinə məruz qalıb, bəziləri həbs olunub, bəziləri isə iri məbləğdə cərimə olunub. Qəzet və jurnalların əksəriyyəti hökumətyönlü və hökumətə yaxın olan insanların şəxsi nəşriyyatlarında çap olunub. Müstəqil və müxalifətçi qəzetlərin əksəriyyəti şübhəli maliyyə vəziyyətində qalıblar.
Məruzədə bildirilir ki, hökumət bəzi dövlət kitabxanalarının müxalifət qəzetlərinə abunə olmasına mane olub, özəl biznesə təsir göstərməklə dövlət və özəl firmaların bu nəşrlərdə reklam yerləşdirməsinə imkan verməyib.