Azərbaycan, Bakı, 31 mart / Trend , müxbir K.Zərbalıyeva/ Azərbaycanın Ədalət Partiyasının sədri, deputat İlyas İsmayılovun oğlu Etimad İsmayılovun vəkili onun müdafiəsindən uzaqlaşdırılıb.
Vəkil Cərulla Ramazanov bazar ertəsi Moskvadan telefonla Trend a bildirib ki, vəkil kimi işdən kənarlaşdırılması ilə bağlı qərarın ləğv olunması və cinayət işinin Rusiya Baş Prokurorluğunun icraatına verilməsi xahişi ilə bu ölkənin Baş prokuroruna müraciət edib.
Müdafiə tərəfi prosesin Çelyabinsk Vilayət Məhkəməsində aparılmasının əleyhinədir və bununla bağlı bazar ertəsi vəkil FTX-də və Rusiya Baş Prokurorluğunda aidiyyatı şəxslərlə görüşüb.
Martın 27-də Rusiyanın Çelyabinsk Vilayət Məhkəməsi İsmayılov haqda 2 ay müddətinə həbs-qətimkan tədbiri seçib. İsmayılova qarşı Rusiya Cinayət Məcəlləsinin dələduzluq və çirkli pulları leqallaşdırma maddələri ilə ittiham irəli sürülüb.
Vəkil bildirib ki, bu işlə bağlı həbs olunmuş digər iki nəfərin də hüquqlarını müdafiə edir. İstintaq orqanı vəkilin digər iki nəfərin də hüquqlarını müdafiə etdiyini əsas gətirərək onu İsmayılovun müdafiəsindən kənarlaşdırıb.
Ramazanov hesab edir ki, bu qanunsuzdur və onun işdən uzaqlaşdırılması siyasi məqsədlə edilib.
İsmayılov martın 25-də Bakıdan Moskvaya qayıdarkən Rusiya Federal Təhlükəsizlik Xidmətinin əməkdaşları tərəfindən Domodedovo hava limanında saxlanılıb.
İsmayılov "Avroasiya" Sənaye-Maliyyə Qrupu Məhdud Məsuliyyətli Cəmiyyətinin sahibidir.
Məqalə müəllifi ilə əlaqə ünvanı: [email protected]
