Azərbaycan, Bakı, 07 aprel / Trend , müxbir C.Babayeva/ Həbsdə aclıq aksiyası keçirən "Gündəlik Azərbaycan" və "Realnıy Azerbaydjan" qəzetlərinin baş redaktoru Eynulla Fətullayevlə həmrəylik üçün bir qrup jurnalistin keçirdiyi aclıq aksiyasına daha bir neçə fəal qoşulub.
Aclıq aksiyasına bu gün hərbi ekspert Canmirzə Mirzəyev, AXCP Ali Məclisi Rəyasət Heyətinin üzvü Rövşən Quliyev, fəaliyyəti dayanmış "Gündəlik Azərbaycan" qəzetinin əməkdaşları Səlim Əzizoğlu və Nemət Hüseynli, Müsavat və Vətəndaş və İnkişaf partiyalarının gənclər təşkilatlarının sədrləri Tural Abbaslı və Nurəddin Babayev qoşulublar. Bu barədə bazar ertəsi Trend a Nurəddin Babayev məlumat verib.
12 saylı Cəzaçəkmə Müəssisəsində saxlanılan "Gündəlik Azərbaycan" və "Realnıy Azerbaydjan" qəzetlərinin baş redaktoru Eynulla Fətullayev martın 26-dan həbsdə aclığa başlayıb. Baş redaktor işinə ədalətli və qərəzsiz baxılmasını, həbsdə olan həmkarlarının azadlığa çıxmasını tələb edir, Avropa Şurası və ATƏT-in siyasi məhbus məsələsində konkret müdafiə mexanizmləri ortaya qoymasını istəyir. Fətullayevə dəstək məqsədilə 12 gündür ki, "Yeni Müsavat" qəzetinin redaksiyasında jurnalistlər, partiya nümayəndələri və hüquq müdafiəçiləri aclıq aksiyası keçirirlər.
Babayevin bildirdiyinə görə, onlar üç gün ərzində aclıq aksiyasına dəstək verəcəklər.
Azərbaycanda səfərdə olan ATƏT-in mətbuat azadlığı üzrə nümayəndəsi Mikloş Haraştinin bu gün aksiya iştirakçılarına və həbsdə olan Fətullayevə baş çəkəcəyi gözlənilir.
Məqalə müəllifi ilə əlaqə ünvanı: [email protected]