Azərbaycan, Bakı, 17 aprel / Trend , müxbir K.Zərbalıyeva/ "İfadə azadlığı haqqında" Qanunun qəbulu üçün Media Hüququ İnstitutu dövlət orqanlarına müraciət edib.
Media Hüququ İnstitutunun Prezidentin İcra Aparatına, Milli Məclisin rəhbərliyinə, komissiya sədrlərinə, millət vəkillərinə ünvanladığı müraciətdə qeyd olunur ki, Azərbaycanda vicdanlı, peşəkar jurnalistləri əsassız iddialardan qoruyan qanunvericiliyə ehtiyac var.
Media Hüququ İnstitutu bir müddət öncə Azərbaycanda ifadə azadlığı ilə bağlı hüquqi konsepsiyaların inkişaf etdirilməsi, qabaqcıl standartlara uyğunlaşdırılması məqsədilə "İfadə azadlığı haqqında" və "Jurnalist mənbələrinin gizliliyinin qorunması haqqında" Qanun layihəsi təklifləri hazırlayıb.
Həmin qanun layihəsi təkliflərinin müzakirəsinin bugünkü durumda önəmli fayda verə biləcəyini vurğulayan Media Hüququ İnstitutu diffomasiyaya görə cinayət məsuliyyətinin ləğv edilməsinin gündəlikdə saxlanılmasını vacib hesab edir.
Media Hüququ İnstitutu qeyd edir ki, "İfadə azadlığı haqqında" Qanun layihəsinin müzakirələrinin aparılması, daha sonra parlamentdə qəbul edilməsi ifadə azadlığı problemləri ətrafında bir qədər gərilmiş durumu tez bir zamanda xeyli yumşalda və ifadə azadlığı ilə bağlı məhkəmə təcrübəsini vacib standartlara yaxınlaşdıra bilər.
Məqalənin müəllifi ilə [email protected] ünvanı ilə əlaqə saxlaya bilərsiniz